Пополека ги привршуваме овогодишните истражувања на археолошкиот локалитет Врбјанска Чука во Пелагонија. Ја доистражуваме една од најголемите неолитски градби во Македонија (околу 120 метри квадратни) и во неа пронајдовме нови стопански структури за чување и обработка на жито, како и движен материјал што го потврдува ранонеолитското датирање на оваа населба.

Во истражувањата учествуваат стручњаци и студенти од Германија (Слободниот универзитет во Берлин), Словенија (Универзитетот при Приморска), Чешка (Универзитетот на Јужна Бохемија) и Македонија (ЦИП, Завод и музеј – Прилеп, Институт за старословенска култура, Универзитетот „Гоце Делчев“ и Универзитетот „Св. Кирил и Методиј). Покрај ископуввањето, со нив вршевме и геодетско документирање со тотална станица, анализа на градежните техники, археоботанички анализи, дронско снимање и работилница за ГИС. Со колегите од Полска направивме геомагнетно скенирање на две тумби во близина на Врбјанска и добивме фасцинантни резултати за организацијата на овие предисториски населби.

Истражувањата продолжуваат и понатаму со лабораториските анализи во Шпанија, Швајцарија, Чешка, Англија, Србија и Македонија, а резултатите ќе ги презентираме во повеќе списанија и конференции.